Сноуден: Ако тајните служби ги таргетираат новинарите нема спас од шпиунирање
Објавено во: Свет 26 Октомври, 2016
Познатиот „свиркач“ Едвард Сноуден на последниот Самит на Глобалната мрежа на уредници во Минхен посочи дека ако тајните служби решат да ги следат новинарите тогаш нема технолошки алатки со кои тие може да ја заштитат својата приватност и анонимноста на изворите што е клучно за истражувачко новинарство, особено во случаи на масовна корупција и злоупотреби на моќ од различни центри, политички или економски.
- Не можете да имате смислена слобода на медиуми без приватност, без приватен простор не можете да ги заштитите своите извори, изјави тој во интервју за Зидојче цајтунг преку видео-врска од Русија. Енкрипцијата може да ве заштити од масовно шпионирање, но не може да ве спаси кога ќе станете цел за следење, посочи Сноуден.
Тој како припадник на американските тајни служби откри масовни детали за начинот на кој владата на САД применива широки мерки на следење и злоупотреба на системите со што директно беше нарушена приватноста и слободата на граѓаните. Стравот е дека со новите напредни алатки и приватниот сектор или центрите на моќ ќе може се полесно да таргетираат новинари, истражувачи или активисти.