Добивај вести на Viber
Илјадници демонстранти од Истанбул, Анкара, Измир, Анталија, Ескишехир и многу други градови во Турција им се приклучија на „стоечките протести“ против Владата, кои започнаа во понеделникот.
Тие протестираат против авторитарната влада на премиерот Ердоган, како и против употребата на сила од полицијата во текот на минатите денови. Акцијата на нем протест ја почна еден турски кореограф, кој со часови стоеше немо и неподвижно на плоштадот Таксим, а кого медиумите го нарекоа „Човекот што стои“.
Демонстрантите стојат и го насочуваат својот поглед кон делот на Културниот центар, на кој стои портрет на основачот на Турција, Кемал Ататурк.
Демонстрантите побараа од поддржувачите да не провоцираат немири, но повикаа да се бојкотираат сите провладини компании, медиуми, банки и големи синџири на угостителски објекти во следните четири месеци.
Исто така, е предложено и турските граѓани да не посетуваат неколку луксузни хотели во околината на плоштадот Таксим, кои ги затворија вратите за демонстрантите при полициската интервенција во паркот Гези.
Полицијата, која минатите денови масивно интервенираше со солзавец, засега се држи настрана, но водените топови се спремни за интервенција. Турската полицијата вчера уапсила до 130 демонстранти, а тие се обвинети за учество во протестите против владата и употреба на сила против полицијата, се вели во медиумските извештаи. Во полициските акции спроведени деновиве уапсени се повеќе од 600 лица.
Во текот на демонстрациите во Турција повредени беа повеќе од 5000 лица, а загинаа 4 луѓе.