Солун денес ќе трепери од демонстрации: Протест и контра протест за Македонија

Добивај вести на Viber

Во 14 часот по локално време во Солун ќе се одржи долго најавуваниот протест против името Македонија.

„Македонија е Грција“ пишува на паното закачено од рано утрово над бината во центарот на грчкиот град кој денеска живее во ритамот на демонстрациите, со зголемено полициско присуство и поради протестот, но и поради контра-протестот што го организираат анархистички и левичарско ориентирани организации, јавува дописникот на МИА .

Според организаторите, јавува дописникот на МИА од Атина, се очекува да се соберат околу 30 илјади граѓани, кои со организиран превоз, со 500 автобуси од доцна синоќа, од цела Грција, пристигнуваат во Солун.

Организатори на собирот се грчки здруженија и организации од дијаспората, а имаат поддршка, меѓудругото, и од политички партии, спортски и христијански здруженија, градоначалници и митрополити од различни општини. Преку протестот, бараат да не се користи терминот „Македонија“ во името на нашата земја.

Еден час порано, во 13 часот, левичарски движења и анархистички организации организираат контра протест во другиот дел од градот. Според објавените соопштенија на анархистички сајт, тие ќе се соберат против национализмот, затоа што, велат дека национализмот значи крв, насилство, војна и смрт, а „фашистите секаде во светот говорат ист јазик“.

Протестот во Солун денеска е главна и централна тема во Грција, дел од онлајн изданијата на грчките медиуми, најавуваат дека во живо, на нивните сајтови, ќе го пренесуваат собирот, додека пак коментарите на грчките новинари се дека масовноста на протестот би можело да значи и порака до грчката влада во однос на преговорите за името.