Србија му го пресретнува патот на проектот „Голема Албанија“?
Објавено во: Балкан 05 Мај, 2017
Србија на амбасадорите на членките на ЕУ им врачи „нон пејпер“ со четири барања поради тензиите во регионот и „легитимизацијата на проектот голема Албанија“, пренесоа српските медиуми.
Документот бил поделен на средбата на амбасадорите со министерката задолжена за европските интеграции Јадранка Јоксимовиќ и шефот на Канцеларијата за Косово и Метохија, Марко Ѓуриќ.
Во документот се изнесуваат четири барања, а првото е релевантните меѓународни играчи да ја осудат агресивната реторика која го турка Западниот Балкан во нови судири и поделби.
Се бара продолжување на дијалогот меѓу Белград и Приштина, избалансирано мирно политичко решение за кризата во Македонија и уважување на меѓународните норми околу почитувањето на територијалниот интегритет и суверенитетот на меѓународно признатите држави.
Во документот, се наведуваат и најекстремните изјави на албанските политички лидери од почетокот на годината.
Ѓуриќ следната недела истиот документ ќе му го достави и на шефот на УНМИК на Косово, Захир Танин, со барање да му го проследи на генералниот секретар на ОН Антонио Гутереш.
На средбата присуствувале амбасадорите на речиси сите членки на ЕУ во Србија, вклучувајќи ги и петте држави што не го признаваат Косово.
На српските аргументи за агресивниот настап на Албанците во регионот и потребата за поголем ангажман на Брисел, дипломатите на ЕУ кажале дека сите страни треба да ги смират страстите. Велат дека целта е мир и стабилност во регионот.
Радикални изјави во последно време имаше од политички челници од Косово и од Албанија.