СРЕДБА БРНАБИЌ - ЈОВАНОВСКА - ТИПКО: Кои се насоките за развој на добрососедски односи?
Објавено во: Балкан 07 Септември, 2017
Српската премиерка Ана Брнабиќ денеска се сретна со македонската амбасадорка во Белград, Вера Јовановска – Типко, при што разговарале за натамошното јакнење на добрососедските односи и на регионалната соработка.
Брнабиќ нагласила дека двете држави имаат многу простор за развој на меѓусебните односи, особено во економијата и туризмот, нагласувајќи дека имплементацијата на Акциониот план за регионален економски простор на Западен Балкан е значајно прашање кое ќе ја олесни и подобри соработката.
Од кабинетот на Брнабиќ информираат дека таа му пратила покана за посета на Белград на премиерот Зоран Заев, оценувајќи притоа дека средбата ќе биде позитивен исчекор во односите меѓу двете земји.
Брнабиќ и Јовановска - Типко се согласиле дека без политичка стабилност нема ни економски просперитет и дека искрениот и отворен дијалог е единствениот начин за надминување на сите отворени прашања.
Во петок навечер во Белград македонската амбасада ќе организира свечен прием по повод Денот на независнота 8-Септември, на кој се очекуваат највисоките преставници на српскиот државен врв.