Добивај вести на Viber
Вицепремиерот и министер за финансии Зоран Ставрески денеска беше во најавена посета на домот на Иван и Ивана Стојановски во Скопје, млад брачен пар кој пред половина година се пресели во нов дом преку владиниот проект „Купи куќа, купи стан“.
За време на посетата Ставрески изрази задоволство од проектот за кој вели дека е платформа за поддршка на семејните вредности.
„Домот и нашите најблиски се она што го прават нашиот живот. Проекот „Купи куќа, купи стан“ се базира на давањето шанса. Владата им дава шанса на стотици вакви семејства да дојдат до свој дом и да почнат да ја градат својата иднина. Знаење во животот е да се препознаат добра шанса и да се искористи“, изјави министерот.
Семејството Стојановски се едни од 110 вакви семејства кои досега добија кредит преку проектот „Купи куќа, купи стан“, а одлучиле да го искористат моделот половина рата.
Според моделот „Половина рата“, Владата ќе плаќа половина од месечната рата (главница и камата) во првите 5 години од отплатата на кредитот. Каматата на станбениот кредит е субвенционирана и изнесува 4,99% за првите три години и 5,5% за четвртата и за петтата година од отплатата.
За вториот модел пак „Половина учество“, Владата се обврзува да плати 50% од учеството за кредит за купување стан или за изградба на куќа, или најмногу до 6.250 евра за кредит од 50.000 евра. Каматата на станбениот кредит е субвенционирана и изнесува ЕУРИБОР + 4,5% поени во текот на целиот период на отплата. Секако, цената на становите не смее да надмине над 900 евра по квадрат, а враќањето на кредитот не смее да биде пократко од 20 години.
Според информациите, Владата до сега субвенционираше во станбени кредити од вкупно 3,5 милиони евра за проектот “Купи куќа-купи стан“.