Добивај вести на Viber
Светот е „ужасно близу" до рецесија, тврди менаџерот на израелската централна банка Стенли Фишер. Иако е направено многу за закрепнување на глобалната економија, саканиот ефект се уште не е постигнат, коментира тој.
Програмата за подобрување на ликвидноста ја зголемува довербата во Федералните резерви (ФЕД), посочува Фишер, изразувајќи поддршка за активностите на претседателот на централната банка Бен Бернанке. Сепак стравува дека со оглед на тоа што не е поставена горната граница за откуп на обврзници од страна на ФЕД, целата програма ризикува да пропадне уште пред да ја постигне целта.
Коментарите на Фишер доаѓаат откако Меѓународниот монетарен фонд (ММФ) ја намали прогнозата за глобалниот раст, предупредувајќи дека растот ќе забавува се додека САД и Европа не се справат со заканите по нивната економија. Слабата потрошувачка и буџетските заштеди во дел од развиените земји се одразуваат на новите пазари како Кина и Бразил.
„Ужасно сме близу до глобална рецесија", нагласува Фишер, кој во периодот 1994 година - 2000 година беше и заменик извршен директор на ММФ.
„Порастот е прилично анемичен. Европа технички е во рецесија, а во САД економската експанзија ќе остане под 2% во текот на следните неколку месеци ", додава тој.
Што се однесува до ризиците околу еврозоната, Фишер истакнува дека со одлуката да се интервенира на облигационните пазари при одредени услови, претседателот на Европската централна банка (ЕЦБ) Марио Драги, отстранил огромен дел од ризикот за колапс на еврозоната.