Стојанче Ангелов: КАТЕГОРИЧНО “НЕ“ ЗА ДВОЈАЗИЧНИ (ТРОЈАЗИЧНИ) УНИФОРМИ
Објавено во: Македонија 12 Август, 2017
Стојанче Ангелов кој повторно ќе работи во Министерството за внатрешни работи се спротиставува на идејата за примена на двојазични полициски униформи.
- Од осамостојувањето на Република Македонија во 1991 година полициските униформи се ДВОЈАЗИЧНИ, напишани на кирилица на македонски јазик (ПОЛИЦИЈА) и на латиница на англиски јазик (POLICE). Не верувам дека во Македонија, дури и во најзафрлените планински села, постои човек кој не умее да го прочита и разбере зборот ПОЛИЦИЈА или зборот POLICE.
Со предлог законот за јазици се предвидува униформата на македонската полиција да стане тројазична односно, покрај на македонски и англиски, истата да биде напишана и на албански јазик.
Од професионален полициски аспект исто како и од аспект на реалните потреби на македонските граѓани, не постои ниту една единствена, практична но воедно и чесна причина кон Република Македонија, која го оправдува користењето на албанскиот јазик на униформите на македонската полиција. Причините поради кои албанскиот политички фактор инсистира а дел и уценува за користење на албанскиот јазик на униформите на македонската полиција се од сосема поинаква природа.
Затоа, уште еднаш, категорично “НЕ“ за употреба на албанскиот јазик на униформата на македонската полиција, напиша Ангелов во објава на Фејсбук.