Стојановска: Законските измени за подршка на лицата со попреченост предизвик за Парламентот и новата Влада!

Добивај вести на Viber

Потписите  за „Граѓанската иницијатива   5 до 12” се собраа, книгите за солидарност  се затворија и чекаат Иницијативата да влезе во законска процедура со што ќе им се даде шанса на лицата со посебни потреби за исполнување на нивните основни човечки потреби и права. Сузана Стојановска е самохрана мајка на тринаесет годишно дете со даунов синдром кое вели и денес сеуште ги нема остварено правата кои се му загарантирани со Устав. Листата на проблемите со кои се соочуваат како што вели  е долга, а зборовите не се доволни да ја опишат голготата низ која  го поминуваат секој нов ден. 

“Како родител на дете со посебни потреби ги предизвикувам сите заинтересирани да поминат 24 часа со нашите деца, заедно со нас, во условите во кои живеееме, за да можат да разберат зашто се одлучивме на вакви радикални чекори. Затоа, симболично „5 ДО 12“ значи дека е време да бидеме видени, прифатени, интегрирани и еднакви. Дали би кампувале со нашите деца со посебни потреби и би го ризикувале нивното здравје на -5, во шатори под  отворено небо во градскиот парк, доколку некој од надлежните воопшто не примети и ни обрна внимание последните 10 - 15 години ?! Нашите деца се тие „хендикепираните“што немаат слух, што не гледаат, што имаат „проблем“ со логика и расудување.Нашите деца се тие, аутистичните, ретките, инвалидите, посебните. Затоа, кога некој од „надлежните“ ќе се спореди со нашите деца, еве јавно овде и сега, ја користам оваа прилика да ги повикам и предизвикам „НАДЛЕЖНИТЕ“ заедно со нашите деца да поминат на стручна евалуација и категоризација и да добијат заверен документ дека се способни да одговараат, освен за себе  и за нашите  и за вашите деца и за сите останати во Македонија”- објаснува Стојановска. 

На иницијативата подршка и дадоа илјадници граѓани кои во редици чекаа за да изразат поддршка. Се собраа  повеќе од потребните 10 000 потписи меѓу кои беа јавни личности,  невладини здруженија, случајни и намерни минувачи кои  бараат подобри услови со кои би го олесниле животот на лицата со посебни потреби.

“Процедурата предвидува административно-технички протокол, кој се поднесува до Собранието и  надлежните институции кои во моментов не се функционални, во оваа ситуација во нашата држава. Сепак, ние веќе немаме време да чекаме, и оваа иницијатива има за цел освен симболично, така и фактички да им покаже и докаже на сите надлежни и одговорни, колку не има, дека сме тука и дека ќе останеме се до исполнувањето на нашите барања” – вели Стојановска.

Минатата недела дел од родителите кампуваа пред Парламентот и упатија порака дека нема да се откажат се додека не бидат исполнети нивните барања. 

“Координативното тело на „5ДО12“ изложи дел од барањата за измени на законите и подзаконските акти кои се однесуват на лицата со посебни потреби. Тие барања се само дел од  системските решенија кои се подготвуваат и се предмет на Иницијативата, а ги вклучуваат сите категории на хендикеп, попреченост или посебни потреби. Во моментов се ревидираат барањата на лицата со ретки болести и сите останати категории на попреченост. „ГРАЃАНСКАТА ИНИЦИЈАТИВА - 5ДО12“ ќе трае се додека не се исполнат нашите барања, или во превод, ќе кампуваме пред Собранието, секој месец по три дена, и ќе ја мобилизираме македонската јавност за поддршка во остварување на нашите цели”- потенцира Стојановска.

Потпишувањето на иницијативата  почна спонтано, но очекува борбата за нивните права да биде организиран и институционален пристап за долговорочни и системски решенија. 

“Сите ние и родителите и семејствата и лицата со посебни потреби се соочуваме  со различни помали и поголеми проблеми. Проблеми во здравство, образование, социјална помош и поддршка. Затоа, ова е борба за сите нас, без разлика на пол, раса, религија или политичка определба. Ова е борба која ја водиме заедно, за заеднички интереси е чиста како солза, сакаме само најдобро за своите деца”- нагласува Стојановска. 

Во моментов вели се ревидираат барањата и потребите за различни категории на хендикеп. Барањата биле испратени до надлежните   институции уште пред три години, а ваква Иницијатива била  покрената и пред парламентарните избори мината година. Но и покрај тоа, вели Сузана  никој не ги вклучил нивните  деца и нивните права во изборните програми.

“Овие барања преведени во законски и подзаконски акти ќе бидат доставени до следното Собрание, до следната Влада и надлежните министерства  со рокови за извршување. Без разлика кој ќе седне на тие 120 столчиња во Собранието, вклучително и во столчињата на следната Влада, сите мораат да бидат свесни дека се одговорни за извршување на волјата и барањата на граѓаните, затоа што и ние сме граѓани нели? И ние гласаме на избори и ние имаме основни права кои што Македонија мора да ги овозможи согласно Европската Конвенција и Националната стратегија за изедначување на прават на лицата со хендикеп во Македонија”- вели Стојановска. 

Освен здравствените и институционални проблеми дополнителен проблем се и предрасудите, маргинализацијата и дискриминацијата. Според родителите недостасува вистинска инклузија на овие деца во образовниот процес во кој  нема доволно дефектолози ниту  стручен кадар во Центрите за деца со попреченост во развојот.  Дел од барањата  кои ги испорачаа пред надлежните се измени во Законот за семејство со што ќе   се обезбеди грижа за децата со посебни потреби по смртта на родителите, квалитетни здравствени испитувања, соодветна терапија за лекување и олеснување на животот, здравствено осигурување по наполнети 26 години.