Добивај вести на Viber
Фондацијата Т – Мобиле за Македонија и УНИЦЕФ ќе отворат дополнителни Центри за ран детски развој во заедниците каде тие се најпотребни.
Центрите за ран детски развој кои ќе се отворат преку ова партнерство се базираат на пилот – модел од УНИЦЕФ. Истите беа формално признаени со последните промени во Законот за детска заштита и се најрентабилна алтернатива на градинките. Тие најдобро ги опслужуваат заедниците во кои не постојат градинки, како што се руралните средини и маргинализираните заедници.
-Фондацијата Т – Мобиле за Македонија и УНИЦЕФ имаат иста цел – сакаме да го подобриме квалитетот на животот за децата, особено оние од социјално загрозени средини, и преку ова партнерство планираме да го постигнеме токму тоа“, изјави денеска Леа Липша, директор на Фондацијата.
-Првите пет години од животот се најважни за детскиот развој и имаат долгорочни последици.Во текот на првите пет години од животот, мозокот најбрзо се развива и научно е докажано дека децата кои посетуваат висококвалитетни програми за ран детски развој постигнуваат подобри резултати во училиште и има поголема веројатност тие подобро да напредуваат во животот“, истакна денеска Шелдон Јет, претставник на УНИЦЕФ.
Имајќи ја предвид структурата на постојниот систем, само 43 од сите општини имаат градинки, а 90 отсто се наоѓаат во урбаните средини, главно во Скопје. Само шест отсто од децата кои живеат во руралните области, учествуваат во програмите за ран детски развој. Во овие програми нема скоро воопшто деца од најсиромашните домаќинства.
Фондацијата Т – Мобиле ќе донира најмалку 50.000 долари за отворање на овие дополнителни центри, а наскоро ќе почне и големата кампања за собирање на средства за отворање на центрите.