Тачи: Немаме аспирација за промена на границите со Албанија

Добивај вести на Viber

Немаме аспирација за промена на границите со Албанијa, изјави претседателот на Косово, Хашим Тачи во својот говор на 93-тиот семинар на Парламентарното собрание на НАТО, кој се одржува во Приштина. 

Тој вели  дека односите на Косово со Албанија се одлични и сите треба да се задоволни од тоа. Додаде дека Косово има добри односи со сите земји во регионот. 

„Немаме аспирација за промена на границите со Албанија. Аспирациите на Косово се евроатлантски и во оваа насока работат сите партии во земјата“ - вели Тачи. 

Нагласи дека е многу важен приемот на Македонија и Црна Гора во НАТО, а за регионот е од суштинско значење ЕУ исто така да не доцни со интеграцијата на земјите од Западен Балкан. Тврди односите меѓу Косово и Србија веќе не се закана за безбедноста, иако пред 17 години двете страни беа во конфликт. 

„Почнавме дијалог со Србија и благодарение на тоа веќе можеме да се гледаме како пријатели“ - додава Тачи. 

Подобрувањето на односите меѓу Приштина и Белград влијае и врз односите со другите земји, истакна Тачи и ја спомена посетата на албанскиот премиер, Еди Рама во Србија. Претседателот на Косово, смета дека неговата земја го надмина радикализмот и во последно време ниту еден косовски државјанин не заминал во зона на конфликт.

И Рама минатата недела изјави дека неговата земја не планира обединување со Косово и дека идејата за Голема Албанија е во минатото.