Текстилните работнички во Штип добивале пари на рака
Објавено во: Економија 20 Март, 2017
Се кршат работничките права на текстилните работнички од штипските конфекции.
Тие дел од плата добиле на рака во кеш. Освен плата од 6.000 до 7.000 денари, што им стигнува на сметка, дел од конфекциите во Штип на работниците им исплаќале од 1.500 до 3.000 денари во плик.
Ова го тврдат од Здружението „Гласно“, чии членови денеска објавија документ што до нив го доставила текстилна работничка. Горан Трајков од „Гласно“ вели дека работодавците со ова го прекршуваат законот и директно го оштетуваат државниот буџет, избегнувајќи да плаќаат данок.
„Платата е 7.000 денари, некаде 6.000 денари, а 3.000 или 2.500 денари се даваат на рака. Тука, во конкретниот случај со работничката со која разговаравме, се 1.800 денари. На прашањето зошто пари на рака, ѝ било одговорено: „Така земаат сите и ти така ќе земеш“ – изјави Трајков.
Иако исплатата на минималната плата од 10.080 денари е законски задолжителна, сопствениците на конфекциите, според Трајков, го користат недоречениот дел од законот за минимална плата, во делот за нормиран учинок. Практично, тоа значи дека сопствениците ја зголемуваат нормата, која станува нереална за остварување и тоа е оправдување за пониските плати, бидејќи работниците изработуваат многу помалку од предвидените 100%.
Синдикатот, Текстилниот кластер и Сојузот на работодавци имаат потпишано да се дозволи нормиран учинок.
„Нормираниот учинок не е разјаснет до крај, а тоа работодавците го злоупотребуваат. Секојдневно им ја менуваат нормата на работниците. Оттука, недостига класификација на работните места по операции и затоа работниците во текстилната индустрија не можат да достигнат 100 отсто успешност“ – објаснува Трајков.
„Гласно“ упати апел до институциите да го проверат работењето на конфекциите во делот на исплата на плата, а заедно со Хелсиншкиот комитет за човекови права, најави реакција до инспекциите. Ова е практика во Штип, но можно е овој проблем да постои и во другите градови.