Телевизиите, ММИ, Министерството за култура: Кој ќе ја спаси македонската музика!?

Добивај вести на Viber

Трите телевизии со национална концесија, Сител, Канал 5, Алсат-М, остануваат на одлуката да не пуштаат македонска музика и побараа да се одземе лиценцата на Македонската Музичка Индустрија, ММИ. Телевизиите упатија писмо и до министерката Елизабета Канческа-Милевска во кое стои дека почнувајќи од вчерашниот ден, прогласен е мораториум за емитување на било кој вид на домашна музика. „За жал, не вродија со плод нашите аргументи дека ТВ станиците не експлоатираат фонограми, туку аудио-визуелни дела, односно видеограми за кои ММИ нема добиено лиценца. Очигледно е дека ММИ не ги прифати многуте забелешките на Министерството за Култура, а згора на тоа, без никаква правна логика и разум достави известување до нашите ТВ куќи дека со почеток на оваа година ќе започне со побарување на средства без никаков законски основ, при тоа нудејќи ни дури и одредени попусти“, соопштика трите телевизии. Министерката за култура Елизабета Канческа-Милевска побара до неа да се достави дописот од ММИ, за да се изнајде заедничко решение. „ Ние претходно, по извршениот надзор, препорачавме да се преговара и да се договорат условите на соработката помеѓу телевизиите и ММИ околу начинот на прибирање на средствата. Доколку здружението ММИ не постапило по препораката и не доставило допис за договарање и преговарање за наплатата и тарифникот, не може и неприфатливо е да врши наплата. Доколку тоа е сторено, Министерството ќе преземе соодветни мерки“, изјави министерката Канческа-Милевска. Инаку ММИ  почна со работа пред неполн месец кога повика на поддршка за заштитата на правата на продуцентите и изведувачите.