Терористи од Македонија уапсени во Турција

Добивај вести на Viber

Двајца македонски државјани кои живееле во Германија се меѓу упасените 400 осомничени терористи, од  турската полиција, под сомнеж дека припаѓаат на „Исламска држава“ (ИД), објави германскиот весник „Велт“.

Според информациите на „Велт“ македонските власти веќе побарале од Турција да ги екстрадира двајцата уапсени во Македонија, за да им се суди. 

Повикувајќи се на германските власти, весникот пишува дека се работи за лицата Аднан С., кој живеел во Бремен, и Зулхајрат С. од Хамбург. Според информациите и двајцата во Турција допатувале од Сирија.

Осомничените џихадисти биле уапсени во Турција додека барале хирург, со цел да легнат под нож и да го променат личниот изглед да да можат да ги минат граничните контроли без да бидат забележани.

Во написот се додава дека дозволите на осомничените терористи за престој во Германија биле истечени, па тие не можеле легално да се вратат во земјата, затоа што не поседувале германско државјанство, туку само македонско.

„Велт“ пишува дека засега нема докази дека осомничените планирале да извршат напади во Европа. Според весникот,  можно е тие да ја напуштиле ИД, поради што и побегнале од Сирија, меѓутоа, Германската Федерална криминалистичка служба формирала посебна истражна група, која била задолжена да го испита овој случај.