Тевдовски најави поврзување на домашни и странски компании од автомобилската индустрија
Објавено во: Економија 16 Октомври, 2017
Транспарентниот и чесен пристап на Владата, како и приближувањето кон НАТО ќе донесе дополнителни странски инвестиции во земјава. Активно се работи на проект за поврзување на домашни и странски компании од автомобилската индустрија со што ќе се обезбеди повеќе работа и домашните фирми. Ова во интервју за Гласот на Америка го истакна министерот за финансии Драган Тевдовски кој учествува на Годишните средби ММФ и Светска банка во Вашингтон. Тевдовски во интервјуто зборува и за проекциите за економски раст, за позицијата на Македонија како мала и отворена економија и за предизвиците кои ја очекуваат.
Тевдовски за последните најави на директорката на ММФ Лагард дека следи ново поглавје во светската економија, глобалниот раст се проценува на 3,6 отсто вели дека зрачат со оптимизам.
„Тоа е добро бидејќи изминативе години очекувањата беа попесимистички, се зборуваше за попроблематични сценарија. За Македонија ова е многу важно бидејќи ние сме мала и отворена економија, која е зависна од она што се случува надвор. На пример, 70 отсто од нашиот извоз оди во Европската Унија, 47% во Германија, така да тоа е важно за Македонија и значи дека Македонија ќе има шанси да го зголемува својот економски раст, ако случувањата на светско ниво се позитивини и добри“, посочува министерот.
И покрај сите најави на сите претходни македонски влади за странски инвестиции, тие отстуствуваат. Дали има начин да се забрзаат странските инвестиции, сега кога политичката криза е зад Македонија?
На ова прашање министерот одговори вака:
“Политичката криза, нестабилноста и неизвесноста секако дека влијаат на инвестициите. Нашиот пристап е да имаме транспарентен однос со инвеститорите, да поставиме чист терен за игра, инвеститорите ќе знаат точно со што се соочуваат. Нема да има никаков простор за работи на страна, корупција или слично. Тоа е добро и ќе донесе дополнителни странски инвестиции. Исто што е многу важно и што е наш приоритет е да работиме на поврзување на домашните компании со странските инвеститори, тоа сериозно отсуствуваше изминатите години. Во моментот преку проект на ИФЦ се работи на поврзување на домашните компаннии од автомобилската дејност со странски компании. Тоа е сериозен чекор напред кој ќе има мултипликативен ефект што кај нас во Македонија отсуствуваше. Секако дека кога се зборува за странски инвестиции, приближување кон НАТО, е најбитен сигнал за безбедноста на земјата. Мислам дека тоа е многу важно и дека ќе донесе дополнителни странски инвестиции“, посочи Тведовски.