Тевдовски најави ребаланс на буџетот - каде ќе има кратења?
Објавено во: Економија 22 Јуни, 2017
Министерот за финансии, Драган Тевдовски најави ребаланс на буџетот.
Сѐ уште не е утврден датумот за корекција на државната каса и вели дека во моментов во Министерството се прават проценки и анализи. Вели дека во тек се разговори со сите министерства и дека се прават напори да се скрати од тоа што значи комодитет на луѓето на власт.
„Се наоѓаме на крај на јуни и ќе направиме сѐ што е во наша надлежност да добиеме еден буџет кој што ќе биде прагматичен, имајќи ги во предвид и оние обврски кои се наталожени со години, а истовремено да дадеме можност на нашите реформски приоритети“- изјави Тевдовски.
Министерот додаде дека согласно изгласаниот Буџет за 2017 година од претходната власт, има потреба од финансирање преку задолжување и на домашниот и на надворешниот пазар. Тевдовски вели дека за издавање на еврообврзница не се размислува пред донесување на ребалансот на Буџетот.
„Ги оценуваме можностите и можеби ќе оцениме и еврообврзница да не издаваме. Така што ние ги гледаме кои се можностите од аспект на доброто на граѓаните односно да плаќаат пониски стапки“ - изјави Тевдовски.
Потенцира дека ги разгледуваат можностите за задолжување на домашниот пазар.