Тилерсон го повика Роуани да ја разбие „терористичката мрежа“ во Иран
Објавено во: Свет 21 Мај, 2017
Американскиот државен секретар, Рекс Тилерсон вчера го повика реизбраниот ирански претседател Хасан Роуани да ја разбие „терористичката мрежа“ во неговата земја.
Тој бара и да го прекине тестирањето на балистичките проектили, во првата американска реакција по штотуку завршените ирански претседателски избори.
САД и сунитските арапски монархии во Персискиот залив го обвинуваат Иран дека ги поддржува „терористичките групи“ и дека ги поттикнува судирите на Блискиот Исток. Се работи за шиитските заедници и милиции во регионот, кои се противници на сунитите.
„Се надевам дека Роухани ќе го прекине финансирањето на иранската терористичка мрежа и ќе ги уништи нејзините капацитети, логистика и сето она што придонесува за јакнењето на дестабилизациските сили во блискоисточниот регион“- изјави Тилерсон.
Тој ја даде оваа изјава на прес-конференција во Ријад која ја одржа заедно со саудискиот колега Абдел ал-Џубеир во текот на посетата на американскиот претседател Доналд Трамп на Саудиска Арабија.
САД деновиве ја објавија одлуката дека продолжат со политиката на укинувањето на санкциите против Иран. Тоа е во рамките на меѓународниот договор за иранската нуклеарна програма од јули 2015 година. Но, американското Министерство за финансии истовремено објави дека воведува нови санкции против иранските челници во врска со програмата за балистички проектили.