Тимоние: Македонија да се сврти кон патиштата коишто никогаш не би требало да ги напушти
Објавено во: Македонија 23 Јуни, 2017
По формирањето на новата Влада, време е Македонија да се врати на патот на ЕУ и НАТО интеграциите коишто никогаш не би требало да ги напушти, изјави францускиот амбасадор, Кристиан Тимоние во интeрвју за МИА.
Тој вели дека ќе биде потребно време, оптимизам и трпение да се стигне до крајот на тој пат. Според него, време е Македонија да се сврти кон патиштата коишто никогаш не би требало да ги напушти.
„Формирањето на новата Влада сите го сметаат за престанок на еден период на криза. Нормално е оваа новост да биде споделена од сите нас Европејците, од која што сме лично засегнати, како добра вест. Затоа овде повторно се појави оптимизмот и тоа е многу добро, затоа што големите работи неможат да се направат без страст и ниту една реформа неможе да се направи без оптимизам. По периодот на среќа, која ние ја споделуваме, постои и моментот на конкретизирање на работите. Тоа е повторно враќање на патот, но пат за којшто е потребно време да се стигне до крај“ - вели Тимоние.
За најавата на Владата за нов акциски план за спроведување на итните реформски приоритети кои се еден од условите за добивање безуловна препорака за почнување на преговорите со ЕУ, тој го поздрави фактот што Владата не изгуби многу време за таа област, а доаѓањето на еврокомесарот Хан и неговото учество на владина седница го оцени кака многу важно за одлучноста на македонската Влада да ги спроведе реформите во тесна соработка со ЕУ.