Трамп ги повика лидерите да ги избркаат терористите од нивните општества

Добивај вести на Viber

Претседателот на САД, Доналд Трамп  пред претставниците на земјите од Персискиот залив објасни дека САД не е во војна со исламот, туку дека борбата против терористичките групи е борба на доброто и злото.

Ги повика лидерите да ги избркаат терористите од нивните општества и земји. 

„Ова не е битка меѓу различни вери, различни полови или цивилизации. Ова е битка меѓу варварските криминалци, кои го бришат човечкиот живот, и добри луѓе, се во името на религијата. Луѓе кои сакаат да го заштитат својот живот и својата религија. Ова е битка меѓу доброто и злото“ - вели Трамп. 

И покрај тоа што во својата реторика постојано укажуваше на заедничката борба против тероризмот, сепак додаде дека муслиманските земји мора да ја преземат главната улога во борбата против радикализацијата на поединци и групи, затоа што единствена цел е победата над екстремизмот и силите кои раѓаат терор, за децата да живеат во свет без омраза. 

„Првата задача во овој заеднички напор е - вашите нации да забранат влез на секој војник на злото. Секоја земја од регионот има должност да се осигура дека терористите немаат засолниште на нивната територија“ - рече Трамп. 

Тој додаде дека мора да се запрат каналите преку кои терористите добиваат пари. 

Трамп рече дека не треба да се убиваат невини муслимани или да се вршат репресии на жените. 

Обраќањето на Трамп аналитичарите го толкуваат како обид на САД да обезбеди поддршка од муслиманските и  арапските земји во борбата против џихадистичката група „Исламска држава“. Оваа група уште контролира големи територии во Сирија и Ирак и е активна и во други доминантно исламски земји, како Либија, Авганистан и Египет.