Трамп: НАТО е застарен. И други земји ќе го следат Brexit
Објавено во: Свет 16 Јануари, 2017
НАТО е застарен, изјавил новоизбраниот американски претседател Доналд Трамп во интервју за британскиот весник „Тајмс“ и германскиот „Билд“.
„Одамна реков дека НАТО има проблеми. Прво, дека организацијата е застарена, бидејќи е формирана пред многу години. Второ, земјите (членки) не плаќаат колку што треба“, коментира бизнисменот и иден прв човек на САД.
Тој појасни дека малку земји-членки го достигнуваат нивото од 2% од нивниот БДП за воени трошоци, каква е целта поставена од Алијансата во 2014 година.
Ние треба да ги заштитиме овие земји, но многу од нив не плаќаат колку должат, и тоа е неправедно кон САД, изјави Трамп. Според него само 5 држави си ја плаќаат сметката во НАТО: „Пет не е многу“, критикуваше тој.
Според него, НАТО е застарен, бидејќи не се занимава со тероризмот. „Сепак, НАТО останува многу важна организација за мене“, нагласува избраниот претседател на САД.
За време на кампањата Трамп изјави дека ќе размисли двапати пред да и помогне на земја од НАТО, ако САД не бидат „разумно обесштетени“ за поддршката. Коментарот му беше за принципот на солидарност во Алијансата и поконкретно за земјите од Источна Европа, во близина на Русија, во случај на агресија.
Трамп коментира и дека германската канцеларка Ангела Меркел има направено „катастрофална грешка“, отворајќи ги границите на Германија за бегалци.
Тој предвиде успех на Brexit и најави дека сака да потпише во кратки рокови трговски договор со Велика Британија.
Ќе работиме напорно за да склучиме таков договор побрзо и по правилата. Ќе е добро за двете страни, истакна Трамп. Зборовите му се спротивни на бараното од сегашниот претседател Барак Обама дека Велика Британија ќе треба да се нареди на крајот на опашката на чекање за трговски договори со САД, ако ја напушти ЕУ.
Следниот претседател го нарече Brexit “голема работа“ и предвиде дека и други земји ќе ја напуштат ЕУ, следејќи го примерот на Лондон - причината ќе е кризата со мигрантите.
„Тоа беше последната сламка која го скрши грбот на камилата ... сметам дека други ќе ја напуштат Унијата“, рече тој.