Третиот мобилен оператор не „крева“ слушалка
Објавено во: Македонија 24 Мај, 2017
Откако се споија мобилните оператори Вип и Оне во една компанија на македонскиот телекомуникацски пазар дојде до состојба на дуопол, па затоа надлежните институции прават напори да привлечат трет мобилен оператор кој сеуште нема „кренато“ слушалка.
Агенцијата за електронски комуникации на Република Македонија направи сѐ што е потребно за да се обезбеди влез на трет мобилен оператор, со што ќе се зголеми конкуренцијата, ќе се намалат цените, а во истовреме ќе биде подобрен квалитетот на услугите. Ослободен е фреквентен простор, изменета е регулативата и сите други предуслови кои се потребни за инвестирање. Интерес има, но засега нема конкретни понуди бидеќи инвеститорите парите сакаат да ги вложуваат во стабилни држави.
„Имавме остварено доста контакти, имаше интерес од некои оператори, не можам да кажам дека сега нема, но можеби целата ситуација во државата придонесе сето тоа да остане на стенд бај. Тоа е огромна инвестиција и мора да ја гледаме таа инвестиција како и сите други инвестиции“, изјави Сашо Димитријоски, директор на АЕК за време на годинешната конференција на регулаторите од регионот во Охрид.
Претходно се активираше Лајкамобил, но само како мобилен виртуелен оператор кој нуди повеќе услуги користејќи мрежи на веќе постоечките мобилни оператори.