Тројца луѓе заедно побогати од 160 милиони Американци
Објавено во: Финансии 09 Ноември, 2017
Бил Гејтс, Џеф Безос и Ворен Бафет заедно имаат богатство поголемо од заштедата на дури 160 милиони Американци, покажуваат најновите истражувања.
Милијардерите заедно имаат вкупно 248.5 милијарди долари, што ја надминува вкупната вредност на имотот на околу 63 милиони американски домаќинства, а тоа било заклучено во истражувањето под назив Billionaire Bonanza 2017, кое било изработено од страна на американски Институт за политички студии.
„Толку пари концентрирани во толку малку раце, додека голем број на луѓе се мачат – тоа не е само лоша економија туку и морална криза“- се наведува во истражувањето.
Вкупното богатство на 400 најбогати луѓе во САД изнесува повеќе од 2.68 билиони долари што е повеќе од Бруто домашниот производ во Британија, Франција или Индија.
„Нашите 400 најбогати жители сега располагаат со богатство поголемо од вкупните средства на 64% од американското население. Односно околу 80 милиони домаќинства или 204 милиони луѓе. Тоа е повеќе луѓе отколку бројката на жители во Канада и Мексико заедно“- пишува во извештајот.
Се предлагаат два начини за намалување на расчекорот во богатството, прво нееднаквоста да не се влоши уште повеќе со намалување на данокот за богатите, а второ да се примени политика на намалување на концентрираното богатство.