ВЕЛЕС: Добиле социјални станови, но дали и цената е „социјална“?

Добивај вести на Viber

Вкупно 144 велешки семејства со ниски примања, самохрани родители и млади брачни парови се на мака - не можат да ги исплатат становите кои ги добиле како социјални. За нив им била побарана цена од 530 до 600 евра за метар квадратен, за која велат дека е превисока и неприфатлива за велешки услови, а уште повеќе за семејства кои едвај врзуваат крај со крај. Станарите тврдат дека пресметката е направена за станови од прва, иако нивните се од трета категорија. Се обратиле и до акционерското друштво за стопанисување со станбен и деловен простор, но од таму единствено добиле одговор да си ги платат кириите или да ги напуштат становите. „Нашите барања се становите да бидат на откуп од 30 до 40 години, месечната рата да биде од 200 до 250 евра, станарината да ни влезе во откупот на становите и без 30 отсто учество како што ни бараат во решението“, велат велешките семејства. Тие бараат средба со министерот за транспорт и врски Миле Јанакиески за да бараат поповолни услови за откуп на становите.