ВИДЕО: „Исламска држава" го окрвави Мосул, мажи и деца во заеднички гроб
Објавено во: Свет 22 Октомври, 2016
Терористите од „Исламска држава" егзекутираа 284 жители во Мосул соопшти телевизијата CNN, повикувајќи се на извор на службите за безбедност на Ирак.
Групата е притисната поради операцијата за чистење на градот и затоа терористите напаѓаат.
Делото е извршено во четврток и петок во јужните предградија на вториот по големина ирачки град.
Повеќето егзекутирани се мажи, а меѓу жртвите имало и деца. Сите тие биле застрелани.
Потоа булдожер ги собрал труповите во заеднички гроб. Телевизијата наведува дека нема официјална потврда на оваа информација.
Вчера беше соопштено дека висок комесар за човекови права на ОН ги проверува информациите за убиството на 40 мирни жители од село во близина на Мосул.
Градот е со 1,3 милиони население, а од пред две години тој е во рацете на „Исламска држава" и се смета за престолнина на калифатот.
Во северниот ирачки град во понеделникот започна офанзивата за ослободување од џихадисти, предводена од владините сили на Ирак, курдските паравоени формации, поддржани од авиони на коалицијата предводена од САД.