(ВИДЕО) МУГАБЕ ВО ДОМАШЕН ПРИТВОР: Eве што се случува во Зимбабве
Објавено во: Свет 15 Ноември, 2017
93-годишниот претседател на Зимбабве Роберт Мугабе, најстариот светски лидер, е во домашен притвор во својот дом во Хараре. Јавноста за ова ја информираше јужноафриканскиот претседател Џејкоб Зума.
Војската ја презеде контролата во Зимбабве, но тврди дека не станува збор за државен удар и дека Мугабе е на безбедно.
„Мугабе е во притвор во својот дом, но е добро“- вели Зума, кој разговарал по телефон со претседателот кој со Зимбабве владее речиси четири децении.
Зума додаде дека како претседател на Јужноафриканската заедница за развој (САДЦ) испраќа двајца специјални претставници во Зимбабве, својот министер за одбрана и министерот за државна безбедност, за да се сретнат со Мугабе и претставници на војската.
Војската на Зимбабве ја презема власта рано утринава заземајќи ги кабинетот на Мугабе, парламентот, аеродромот и државната телевизија.
Војската се вмеша поради чистката на Мугабе на воените ветерани во владејачката партија.
Тој минатата недела го смени својот потпретседател Емерсон Мнангагва, кој се смета за негов најверојатен наследник и кој ја има поддршката од ветераните. Се закани и дека ќе смени над 100 функционери кои се поврзани со него. Тој власта сака да ѝ ја предаде на својата сопруга Грејс Мугабе (52), која е поддржана од младината на владејачката партија.
Европската Унија изрази загриженост околу ситуацијата во Зимбабве, а САД и Вели Британија им советуваа на своите граѓани во таа земја да останат дома.