(ВИДЕО) Радикали блокираа проруска телевизија во Киев
Објавено во: Балкан 04 Декември, 2017
Десетици радикaли во Киев денеска со бодликава жица и вреќи песок го блокираа влезот во зградата на телевизиската мрежа Нуз уан (NewsONE), која е наклонета на проруската опозиција.
Украинскиот претседател Петро Порошенко го осуди „притисокот врз медиумите“, но на Фејсбук изрази симпатии за „општествената реакција“ кон телевизијата наклонета на Русија.
Проруското сепаратистичко движење се појави на истокот на земјата како реакција на бунтот од 2013-2014 година во кој демонстрантите бараа Украина да ги сведе на минимум врските со Русија и да се сврти кон ЕУ и НАТО.
Русија тогаш го анектираше црноморскиот полуостров Крим и проруските бунтовници водат повеќегодишна војна во источните покраини против централна власт во Киев.
Импровизираната блокада не предизвика прекин на емитувањето на програмата на телевизијата.
Протестот почна околу пладне откако телевизијата прикажала снимки од демонстрациите на поддржувачите на поранешниот грузиски претседател Михаил Сакашвили кој повикуваше на отстранување на Порошенка од претседателската функција.