ВМРО-ДПМНЕ бара ослободување на Темелко за кој тврди дека е сериозно болен
Објавено во: Македонија 22 Ноември, 2017
ВМРО-ДПМНЕ бара ослободување од притвор на градоначалникот на Пустец, Едмонд Темелко.
Како причина ја наведуваат здравствената состојба на Темелко. Според нив неговото притворање е сценарио на СДСМ и на СЈО.
Едмонд Темелко има сериозна болест од која што секој ден му е загрозен животот, велат од ВМРО-ДПМНЕ.
„Притворот на Едмонд Темелко е политичка тортура и газење на човековите права. Единствениот Македонец кој е градоначалник надвор од границите на државава, веќе два месеци се наоѓа во притвор“- изјави денеска Ивица Коневски од ВМРО-ДПМНЕ.
Темелко кој е обвинет за изборни злоупотреби во 2013 година, на 26 септември, се предаде на полицијата по меѓународна потерница издадена од СЈО како осомничен во случајот „Титаник” на СЈО. Темелко беше тема на дискусија на средбата меѓу претседателот на Албанија, Илир Мета, и претседателот на Македонија Ѓорге Иванов ден претходно. Тие бараа Темелко да се третира во хумани услови и да му се овозможи медицински третман.