Воодушевувачки: Биткоинот расте како од вода, докаде ќе оди?
Објавено во: Мои пари 22 Мај, 2017
Криптовалутата биткоин достигна рекордна вредност, надминувајќи ја цената од 2000 долари прв пат во својата историја.
На ова ценовно ниво, вкупната пазарна капитализација на биткоинот исто така се искачи на воодушевувачки 39,92 милијарди долари.
Цената на оваа криптовалута веќе со месеци е на патеката на раст, а само од почетокот на април до денес пораснала за безмалку 65 проценти.
Биткоинот прв пат го премина прагот на вредноста од 1000 долари пред четири години, откако набрзо паднал. Меѓутоа, до крајот на 2016 година повторно ја вратил изгубената позиција и се тргувал на кота од 1000 долари.
Економистите велат дека во тоа можеби допринела широката поддршка на големите финансиски институции, континуиран раст на трансакции во криптовалути и нови прописи на Кина . Она што се случи во почетокот на оваа година, сепак речиси секој го изненади.
Кон крајот на април биткоинот се тргуваше на околу 1 300 долари, а за само три недели во мај цената му пораснала за околу 50 посто, при што минатата недела зајакна за 12 посто.
Сепак, најголема причина за растот на неговата вредност е огромната побарувачка за биткоинот во Јапонија и Јужна Кореја, каде цената повремено му скокнува и преку 2 300 долари.