Воз на кој пишува „Косово е српско“ замина за Косовска Митровица
Објавено во: Балкан 14 Јануари, 2017
Од белградската железничка станица утрово тргна возот за Косовска Митровица, украсен со боите на српското знаме и испишан со паролите „Косово е српско“ на 21 јазик, вклучувајќи го и албанскиот.
Ова е промотивно возење на пробната линија Белград-Косовска Митровца која ќе биде воспоставена од 20 јануари до 26 февруари по што ќе биде донесена одлука дали возот редовно ќе сообраќа.
Внатрешноста на возот е излепена со репродукција на фрески и фотографии од српски културни и историски споменици на Косово под заштита на УНЕСКО, а патниците беа дочекани од хостеси облечени во боите на знамето на Србија.
Возот од Белград го испрати директорот на Канцеларијата на Владата на Србија за Косово, Марко Ѓуриќ.
„Секој ден над десетина автобуси на албански превозници од Косово и Метохија поминуваат низ централна Србија и тука нема никакви проблеми. Се останато би претставувало кршење на човековите права и јас искрено се надевам дека до тоа нема да дојде“ – вели Ѓуриќ.
Тој е првиот воз кој од Белград тргна за Косовска Митровица по 18 години.