Возачи внимавајте! Уште два „пајака“ ќе косат низ Скопје

Добивај вести на Viber

На удар на два нови „пајака“ ќе бидат возачите на автомобили, откако  Јавното претпријатие „Градски паркинг“ започна постапка за проширување на возниот парк на Пајак-службата. Претпријатието распиша тендер, во тек е евалуација на понудите, а наскоро на електронска аукција ќе се избере најповолната понуда. Доколку аукцијата биде успешна и нема жалби на извршената постапка, проценето е дека „пајаците“ веќе од март ќе ловат несовесно паркирани возила. -Оваа набавка е дел од плановите за работа за годинава. Во случајов купуваме две пајак-возила иако моментно ни се потребни вкупно четири. Засега толку ни дозволуваат финансиите, велат од „Градски паркинг“. Не откриваат колку пари планираат да потрошат за набавка на новите „пајаци“, единствено велат дека парите ќе ги обезбедат од сопствениот буџет а возилата ќе ги отплаќаат на 12 рати без камата. Инаку, со набавката на двете нови возила, Пајак-службата на располагање ќе има вкупно осум „пајаци“. Според процените на надлежните, на Скопје му се потребни вкупно десет „пајаци“.