Вработени во АРМ и војници биле дел од „крвавиот четврток“ во Собрание

Добивај вести на Viber

Војници и вработени во АРМ се дел од лицата кои на 27 април влегоа во Собрание и нападнаа пратеници.

Ова го соопшти министерката Шекеринска на отчетот кој денеска го изложи по 100 дена Влада.

Министерката за одбрана открива дека после нападот врз Собранието, еден од припадниците на АРМ кој бил снимен од камерите како учесник во крвавиот настан, од своите надлежни бил пратен на служба во Авганистан.

Во отчетот Шекеринска зборуваше за она што го затекнала во Армијата: екстремно намален буџет за Армијата и одбраната, недостаток на елементарни услови за секојдневно извршување на обврските на војниците, застареност и неодржување на опремата, нарушени односи, 82 милиони евра вредни договори кои се потпишале со една фирма, а само на неколку дена пред изборот на новата влада се поништиле. 

„Немаше доволно пари за исплата на плати на вработените во МО и АРМ, a од друга страна, откако ја симнавме тајноста од документите за службени патувања во земјата и во странство, како и за трошоците за репрезентација, целата јавност можеше да види дека на сметка војската за која немало за чизми, функционерите од ова министерство трошеле лесно, многу и без мерка. Се уверив дека во некои области ситуацијата е полоша и од најцрните предвидувања“, рече министерката.

Како еден од главните приоритети на министерството кое го води во изминатите сто дена, Шекеринска вели дека е враќањето на одбраната на патот кон НАТО и започнувањето на работата на стратешкиот одбранбен преглед. Македонија ќе го користи и системот за поддршка кој и помогнал на Црна Гора да стане НАТО членка, а земјата ќе се движи кон зголемувањето на буџетот на одбраната за да се достигнат потребните 2 проценти од БДП што треба да ги подобри лошите услови во Армијата и да ја модернизира опремата.