За кого, за МАКЕДОНИЈА
Објавено во: Колумни 18 Јануари, 2018
Македонија навива за вас, пеат милиони како еден глас, Македонија сака победа, милион срца една молитва...Ечи на трибините во Загреб, во култната Арена, спортската сала која е симбол за спортски манифестации, национални, европски и светски, а во моментот е место каде се бијат копјата на ракометните европски великани. А меѓу големците, горди, исправени, стасити и достојни се и нашите момци, нашите јунаци, нашите ракометни борци, кои во овие турбулентни времиња, во ова секојдневие кое го битисуваме, а е полно со предизвици и неизвесности ни изнудуваат тронка радост, ни ја хранат нашата напатена душичка со убости, ни ја изнедруваат насмевката на нашите лица и да, највеќе не прават горди на на нашата ни мила држава.
И не случајно првава колумна во новава година ја посветувам на еден убав настан, на Европското првенство во ракомет, на нашите момци-ракометни јунаци кои искрено не прават среќни и емоциите на задоволство и радост после секој натпревар се исцртуваат на нашите лица, а и убавината и пријатност не опсипуваат при секој ракометен натпревар на нашите ракометни големци. Можеби и со право ќе кажам дека единствена светла точка во овие недели, кои изобилуваат со контрадикторни, мачни и тешки државни и општествени теми и дилеми, единстев позитивен дискурс ни се натпреварите, кои со посебен адреналин и радост ги следиме и со солзи радосници крајот о дочекуваме. Нашите ракометари лавовски се борат и не потклекнуваат пред големите авторитети, напротив, тие се сигурни во себе си, полни со ентузијазам, знаење, сила и пред се и над се огромна желба за успех. Ах бре момчиња ракометарчиња, во деминутив намилост ви се обраќам, а вие сте јуначишта, борци какви и требаат на нашата ни мила татковина, мажишта кои гинат на терен и со гордост го носат националниот дрес. Вашата сплотеност, несебичност, големина, борбеност, жилавост и најмногу од се љубовта кон сопсвтената држава ве прави уште поголеми и помоќни и како што се вели гледајќи ве како страствено играте и искрено и од срце се радувате на секој постигнат гол, човек може само да ви заблазни и да посака да учи од вас како се љуби и како се бори за татковината.
Вие мои ракометари треба да бидете пример, најпрво, на сите политичари, бидејќи вашата сплотеност, колективен дух, заедништво, желба за добар резултат е пред се и над се, кај вас не постои егото (јас и само јас), ка вас не постои егоцентризам и индивидуализам, кај вас не постои омраза дури и кон спортски другиот, постои само желба да се успее, заедно и сплотено во вашата цел која е исконска и неприкосновена. Кога би можеле да учат политичарите од вас би сфатиле дека залудно е сето индивидуално богатсво, ако го загубиш колективот, залудна е сета моќ и власт ако убавите мигови не можеш да ги споделиш со ближните, залудна е сета борба за престолот ако на крајот останеш осамен и со наведната глава. Учете политичари од ракометарите дека некои прашања се од национален интерес и со него не можете да си играте, слушајте ја химната која орно се пее од грлата на ракометарите и која пропагира единство и обединување, учете дека јазикот е жива материја, но и суштинска и треба да се негува, учете дека само со разговор и взаемна почит и соработка следува неизоставен успех и учете дека колективниот дух се гради и надградува. Многу може политчарите да научат од раометарите, но само ако сакаат, многу може да разберат за љубвта кон татковината и дека таа нема цена, за приоритетите кои не се остваруваат макијавелистички, туку со ум и разум и заеднишво, за функциите кои се менливи и минливи, но образот останува секогаш, за полтронството и искреноста и уште многу вредности кои се на пиедесталот на врвни вредности кај ракометарите, а кои се правилни и посакувани, вредности кои можеби нашите политичари ги подзаборавиле малку.
За кого, за нашата ни мила Македонија, Ракометарите да бидат пример за сите како се сака, се почитува и за бори за милата ни татковина.
Проф. д-р Татјана Стојаноска Иванова
Институт за социологија
Филозофски факултет-Скопје