Заев се сретна со Тачи - ДПА ќе ги поддржи реформите
Објавено во: Македонија 19 Јуни, 2017
ДПА ќе биде конструктивна и гласна опозиција во Собранието на Република Македонија, но ќе даде поддршка на сите реформи кои ќе значат забрзување на евро-атлантските интеграции на земјата, е главниот заклучок на денешната средба меѓу Претседателот на Владата на Република Македонија, Зоран Заев и лидерот на ДПА, Мендух Тачи.
Тргнувајќи од интересите на сите граѓани заеднички е потенцирано значењето на реформите и геостратешката потреба на Република Македонија да се приклучи како полноправна членка во НАТО алијансата и земјава да добие датум за почеток на преговори со ЕУ.
Претседателот на Владата на Република Македонија, Зоран Заев, ја покани ДПА да се вклучи во процесот на реформите со вградување на своите ставови во процесите коишто следуваат.
Премиерот Зоран Заев и претседателот на ДПА, Мендух Тачи, се согласија дека се што е интерес на граѓаните на Република Македонија заслужува поддршка од опозициската партија.
Во таа насока претседателот на ДПА, Мендух Тачи, најави дека партијата ќе биде конструктивна опозиција којашто ќе ги поддржува интересите на граѓаните и реформските процеси коишто значат придвижување во евро-атланските интеграции, но во исто време ќе биде гласна во своите ставови и критики на политиките за коишто партијата ќе смета дека не се спроведуваат соодветно.