Заев тврди нема амнестија и нема да дозволат втора рунда насилство

Добивај вести на Viber

Oва што го прави Груевски, го прави за да се пазари за амнестија, но амнестија нема да има, вели лидерот на СДСМ, Зоран Заев, во интервју за „Дојче веле“. 

„Амнестија нема да има. По сè што слушна јавноста што сè правел, Груевски ќе оди на суд. Ќе има независен судски систем, судот ќе ја цени неговата вина. Но, бегање од соочување со правдата нема. Ветив на граѓаните, Македонија ќе биде правна држава и правдата ќе важи еднакво за сите“ – вели Заев.

Додава дека новиот спикер Талат Џафери, ќе испрати официјално известување до претседателот на државата, Ѓорге Иванов, дека има демократски формирано легитимно парламентарно мнозинство и дека тој е должен да го даде мандатот за формирање влада.

На прашањето дали очекува втора рунда насилство, затоа што постојат сериозни индикации дека нема да се дозволи мирен трансфер на власта, Заев вели дека нема да им го дозволат сценариото.

„Со таа група околу Груевски, никој не може да биде на чисто во однос на тоа што планираат. Но, јас знам што ние нема да дозволиме. Нема да им го дозволиме сценариото. Мудро, со почитување на деловникот, Уставот и на законите, со смиреност, и наша и на граѓаните, со поддршката и од домашната, но и од меѓународната јавност, ќе ја реализираме нашата обврска за избор на новата влада на граѓаните“ - изјави Заев. 

Тој смета дека граѓаните покажаа зрелост и не подлегнаа на провокациите.