Заев во ОН: Да разговараме со добра волја и да го решиме спорот

Добивај вести на Viber

Мора да го фатиме моментот и да го решиме долгогодишниот спор со Грција, изјави премиерот Зоран Заев, во својот говор од Генералното собрание на Обединетите нации.  

Заев вели дека има свежи напори за надминување на спорот. Додава дека Македонија е пријател на соседите. 

„Би рекол дека и двете страни направија некои грешки низ годините. Но, главната цел сега е да се реши спорот. Цврсто верувам дека мора да го фатиме моментот, да разговараме со добра волја и да го решиме спорот за нашата заедничка иднина. Одржувањето на добрососедски односи е двонасочна улица. Ние сме обврзани да ја направиме нашата работа и го очекуваме истото од нашите соседи. Оваа порака беше веќе јасно пратена до нашите пријатели и партнери“– рече Заев.

Заев го спомена и добриот однос кој Владата што ја предводи го негува кон соседните држави, како и за потпишувањето на договорот со Бугарија за добрососедство.

„Наша цел е да ја забрзаме интеграцијата на Република Македонија во Европската Унија и НАТО. Од длабочините на политичката криза се издигнавме посилни и сме способни да допринесеме за регионалната стабилност и соработка“ – рече Заев.

Тој зборуваше и за проблемите со кои се соочува светот на глобално ниво, терористичките напади и проблемите со мигрантите. Рече дека целта е да се одржи светскиот мир и да има добар живот за сите.