ЗДЕЛКА ВРЕДНА 110 МИЛИЈАРДИ ДОЛАРИ: Сад и Саудиска Арабија со „вооружен договор“
Објавено во: Свет 20 Мај, 2017
САД и Саудиска Арабија објавија договор за оружје за близу 110 милијарди долари. Ова го соопшти Белата куќа во првиот ден од официјалната посета на американскиот претседател Доналд Трамп во странство.
Информациите за зделката се појавија и на Twitter профилот на официјалниот претставник на Белата куќа Шон Спејсер.
Пакетот од оружје вклучува тенкови, борбени бродови, противракетни системи, радарски и комуникациски системи и технологија за заштита од сајбер напади.
„Овој пакет го покажува можно јасниот начин и посветеноста на САД кон нашето партнерство со Саудиска Арабија и партнерите од Персискиот залив, додека во исто време ги проширува можностите за американските компании во регионот и поддржува десетици илјади нови работни места во американската одбранбена индустрија" , пишува во официјалното соопштение на претседателската администрација до медиумите.
Огромната инвестиција не е изненадување ако се земе предвид тоа дека кралството го зазема петтото место во светот по трошоци за одбрана. Само во 2017 година 21% од буџетот на земјата се издвоени за воени цели.
Саудиска Арабија е најголем трговски партнер на САД на Блискиот Исток, потсетува Bloomberg. Податоци на Американското биро за попис на населението од 2016 година покажуваат дека двете страни размениле стоки за околу 35 милијарди долари, а еден од главните удели го зазема нафтата.
Односите меѓу двете држави беа изладени за време на владеењето на Барак Обама, кој имаше помека политика кон познатиот непријател на Саудиска Арабија - Иран.
Претходно денеска Доналд Трамп беше удостоен со највисоко одликување на земјата - златен орден "Крал Абдул Азиз" на името на основачот на владејачката династија. Тоа му се доделува "за напорите за развој на билатералните односи и ширење на мирот и стабилноста во светот, а исто така во знак на благодарност за историските врски меѓу Саудиска Арабија и САД", се наведува во соопштението на кралскиот двор, цитирано од светските агенции.
Американскиот претседател пристигна во Саудиска Арабија утринава .
Утре се очекува Трамп да одржи говор, посветен на борбата против исламските екстремисти и начините за повторно обединување.