Земјоделците деновиве треба да ги добијат субвенциите
Објавено во: Агробизнис 20 Март, 2017
Исплатата на субвенциите се очекува да продолжи оваа недела.
Ова ќе следи откако денеска новоназначениот директор на Платежната агенција, Игор Златков и официјално ќе стапи на функцијата.
Од Министерството за земјоделство, шумарство и водостопанство (МЗШВ), поврдуваат дека Антикорупциската комисија веќе даде позитивно мислење за реализација на финансиската поддршка, средствата се обезбедени. Останува уште Златков да го депонира потписот во Централен регистар.
И производителите потврдија дека добиле ваква информација од МЗШВ поради што, велат, средбата што требаше да се одржи денеска со ресорниот министер Михаил Цветков, е одложена.
Исплатата на субвенциите беше запрена по последните парламентарни избори поради различното толкување на Изборниот законик. За надминување на проблемот, МЗШВ изготви предлог-измени, но на владината седница на која тие се разгледуваа, беше заклучено Антикорупциската комисија да се произнесе околу можноста за реализација на поддршката откако ќе ги согледа сите законски решенија кои го регулираат овој процес.
Субвенциите за 2016 година треба да се исплатат најдоцна до 30 јуни годинава, а за оваа намена се обезбедени 100 милиони евра.