Добивај вести на Viber
Откако Агенцијата за вработување ги преполови невработените, допрва ќе мери зошто Македонците кои се без работа се изјаснуваат како „други невработени лица“. Најновата евиденција на Агенцијата за невработените не нуди одговор каде и како за половина година исчезнаа над 140.000 невработени лица?!
Со дури 17.000 евра Агенцијата за вработување ќе истражува која е причината поради која невработените Македонци се изјаснуваат како "други невработени лица". Таа се јавува како нарачател на анкети од три различни агенции за испитување на јавното мислење, кои треба да и предочат на Агенцијата за вработување зошто невработените се пријавуваат во Агенцијата за вработување во графата други невработени лица.
Институтот за политички истражувања за речиси 5.000 евра, Ипсос Стратеџик Пулс за речиси 6.000 евра и Агенцијата Рејтинг Сп-М за 6.000 евра во летните месеци треба да спроведат теренско истражување на три различни репрезентативни примероци од базата на Агенцијата за вработување, со примерок од 1.000 луѓе. Секоја агенција поединечно, според конкретно наведен прашалник ќе треба да бара одговор зошто Македонците се изјаснуваат како "други невработени лица". Откако ќе ја спроведат анкетата, резултатите треба да и ги испорачаат на Агенцијата за вработување на Република Македонија.
Агенцијата за вработување како државна агенција, кога има потреба од јавна набавка чијашто вредност е над 500 евра, согласно Законот за јавните набавки, треба да распише јавен оглас. Но, за набавката на оваа услуга од трите агенции, Агенцијата за вработување пристапи кон преговарање без претходно објавување на оглас. Причината за ова од Агенцијата ја правдаат со итност.
Преполовен е бројот на невработените
Како што веќе објави Фактор, во Македонија нема ниту 100.000 невработeни – според математиката на Агенцијата за вработување. По половина година пауза, Агенцијата минатата недела го објави податокот за бројот на невработени лица. По завршувањето на процeсот за пререгистрација, во земјава останале само 96.999 невработени лица на крајот на јуни. Од нив 16 се доктори на науки, а 744 магистри. Со високо образование се над 16. 000. Оттука, се наметнува прашањето каде изчезнаа 140.000 невработени?!
Новата евиденција на Агенцијата за вработување, покажува дека бројот на невработени во Македонија е трипати помал од оној што го објави Државниот Завод за статистија, кој што во првото тримесечје изброи 284 823 невработени. Дури и според АВРМ на крајот од 2012 година, пред да започне пререгистрацијата, бројот на невработени бил поголем од 240. 000. Во новите податоците за прилив и одлив на невработени, Агенцијата не обелоденува каде и како за половина година исчезнаа останатите над 140.000 невработени лица?!