Ивица Дачиќ ни праќа за амбасадор контроверзен човек на УДБА?
Објавено во: Балкан 22 Јуни, 2018
Српските медиуми пишуваат дека српскиот шеф на дипломатијата, Ивица Дачиќ, наскоро ќе го предложи поранешниот шеф на разузнавачката служба Раде Булатовиќ, за амбасадор во Македонија.
Булатовиќ во моментов е амбасадор во Украина, каде што заминал откако претходно Турција одбила да ги прими агреманите за тој да може да биде амбасадор во Истанбул, според медиумите.
„Македонија и Македонците, тие несомнено ќе ја разберат оваа нова порака. По Горан Живаљевиќ – агентот фатен во Собранието при обидот за државен удар минатата година – кого Белград мораше да го повлече, сега се испраќа „безбедносен офицер“ од уште повисок ранг и на повисоко место“ - пишува новинарот Мијат Лакиќевиќ за Пешќаник.
Во текстот се коментира и дека српската Влада го пречекала со молк историскиот договор меѓу Скопје и Атина.
Булатовиќ својата дипломатска кариера ја почнал во 1988 година. Бил секретар во југословенската амбасада во Рим, а потоа и конзул во Генералниот конзулат на СРЈ во Истанбул. Од ноември 2000 до март 2003 бил советник за национална безбедност на српскиот претседател Коштуница. По убиството на српскиот премиер Зоран Ѓинѓиќ на 12 март 2003, Булатовиќ е уапсен во полициската акција „Сабја“ осомничен за „здружување поради непријателско дејствување“. Според медиумите, тој наводно бил осомничен дека имал тајни состаноци со Душан Спасоевиќ и со Милорад Луковиќ Легија кои потоа беа осудени за атентат на Ѓинќиќ. Булатовиќ е одлободен по три месеци, обвиненијата се повлечени и доби оштета за незаконско приведување. Од 2004 до 2008 за време на владата на Коштуница е директор на Безбедносната – информативна агенција. Неговото име се поврзуваше со мрежата на помагачи на криењето на Ратко Младиќ, но додека беше шеф на БИА беа испорачани и најголем број на обвинети од Србија.