188 амандмани на ребалансот, толку поднесе ВМРО-ДПМНЕ
Објавено во: Економија 29 Октомври, 2020
ВМРО-ДПМНЕ поднесе 188 амандмани на ребалансот, за да се спречи загадувањето и да се стимулираат капитални инвестиции.
Државата е задолжена за нова 1 милијарда за скоро десет месеци, долгот е на историско највисоко ниво, имаме 40.000 нови невработени, а Зоран Заев се расфрла со парите на граѓаните, изјави пратеникот од ВМРО- ДПМНЕ Бојан Стојаноски.
„Власта предвидува мерка за тим билдинг, која влегува како основ за даночно олеснување на фирмите, и тоа во сред пандемија! Има ли пилот во авионот наречен влада?! Наместо да инвестираме во проекти и мерки кои ќе обезбедат нови работни места владата ќе ги потроши парите за давање на едномесечен паушал во стилот на изборен поткуп кој го спроведоа пред изборите. Зоран Заев не ги применил ниту основните постулати на ММФ, според кои од економска криза може само да се извлече со капитални проекти и вложувања, но наместо капитални инвестиции се зголемуваат ставките за набавка на мебел и привремени вработувања. Но тоа не е за изненадување од влада која дава пари за дресирање на магариња, а илјадници деца немаат лап топ компјутери за следење на настава“, рече Стојаноски.
Вели дека целосно непланскиот буџет проектира минус од 8.5 отсто од бруто домашниот производ и дупка која е 920 милиони евра.Наведува дека тоа се пари кои се покриваат од задолжувања, а тоа значи дека долгот расте и ќе расте, без притоа да се создадат работи кои ќе имаат додадена вредност.