АД ЕСМ: Рокот за набавка на јаглен е продолжен за да се подготват понудите на компаниите
Објавено во: Економија 13 Октомври, 2021
Рокот на јавниот повик е продолжен за три работни дена на барање на странски компании со цел да можат да доставаат соодветни и комплетни понуди, гласи објаснувањето на АД ЕСМ откако беше продолжен рокот за доставување на понудите за набавка на 1,2 милиони тони јаглен за излегување од енергетската криза.
„Во анимирање и поттикнување на компаниите од регионот да се јават на повикот вклучени се и Стопанската комора и Владата на Р. Северна Македонија. Планот на АД ЕСМ е да набави јаглен. Продолжува засилениот ископ на домашен јаглен, но за да можат во краток рок да се вклучат максималните капацитети на термоелектраните согласно моменталните потреби на стопанството за поевтина електрична енергија, потребно е да се набави јаглен и сметаме дека постапката успешно ќе се реализира“, гласи одговорот што го добивме од „Електрани на Северна Македонија“.
Државната компанија за производство на струја ЕСМ го продолжи рокот за достава на понуди за набавка на јаглен за потребите на РЕК Битола и на ТЕЦ Осломеј.
Денеска на веб страницата на државната компанија ЕСМ е објавена измена на тендерската документација со тоа што е продолжен рокот за доставување понуди од заинтересирани продавачи на јаглен. Имено рокот беше до денеска до пладне за кога беше и закажано отварање на понудите по што требаше да следи избор на понудувач. Сега рокот е продолжен за уште пет дена и отварањето на понудите ќе биде во понеделник на 18 октомври еден ден по завршување на првото гласање за локалните избори во земјава.