АГЕНЦИЈА ЗА ФИЛМ: Го поддржуваме објективното новинарство и ЗНМ
Објавено во: Македонија 10 Јули, 2020
Од Агенцијата за филм денеска упатија поддршка до Здружението на новинари (ЗНМ) за заложбата за објективното новинарство и за сите издржани, истражувачки стории.
Велат дека Агенцијата за филм ќе остане доследна во заложбите за транспарентно, правно и праведно работење и секако информирање на јавноста, кое го прави на редовна основа.
„Но, она на што остро ќе се спротивставиме се нарачани медиумски хајки каде позадината е личен или финансиски интерес. Бевме сведоци на негативна медиумска кампања каде се искривуваат фактите и при тоа се потенцира дека Антикорупциската Комисија води постапка, по пријава на Милчо Манчевски, што апсолутно ништо не докажува за работењето на Агенцијата за филм дека се коси со било кој закон. Но, тоа манипулативно се пласира во јавноста, со цел да се остави валкана дамка. Медиумската хајка е препознаена и од страна на сите филмски работници, кои преку свое соопштение го препознаа и интересот и целта зад неа, а се поврзани со тековниот конкурс на Агенцијата за филм. Сите факти ќе бидат презентирани после 15 јули, со цел да се избегнат било какви политички конотации во овие предизборни денови. Филмот во нашата земја живее нов бран, и со разбирање на Вас медиумите тоа допре до широката јавност каде застанавме горди зад нашите автори и се надеваме и во иднина ќе им ја дадеме сета поддршка што ја заслужуваат“, реагираат од оваа институција.
Објаснуваат дека во 2019 и 2020 година, добиени се над 65 филмски награди кои пристигнуваат речиси секој ден, учествувано е на повеќе од 170 филмски фестивали како Берлинале, Санденс, Кан и други, и македонскиот филм се закити со две номинации за Оскар со што испишавме историја во македонската кинематографија.