28 Мај, 2020
0.0311

АКО ДОСЕГА СИ ДОЛЖЕА, СЕГА УШТЕ ПОВЕЌЕ - фирмите не плаќаат, а сакаат да им се плати

Објавено во: Финансии 27 Март, 2020

Ако и до пред кризата предизвикана од коронавирусот не беше тајна дека компаниите доцнат со плаќањата една кон друга, а речиси воопшто не се почитуваше Законот за финансиска дисциплина, сега состојбата е уште подраматична, коментираат за Фактор дел од бизнисмените во земјава.

Речиси секој секому должи и тоа е еден маѓепсан круг, кој воопшто не се успеа да се надмине со законското решение донесено пред неколку години.

Според бизнисменот Горан Рафајловски, дел од причините лежат во фактот што, како што вели, не бил добро осмислен самиот Закон за финансиска дисциплина, а контролната улога и се дала на Управата за јавни приходи, која според него, нема капацитет тоа да го спроведе, но и во стравот што фирмите го имаат да не ги изгубат клиентите, доколку ги присилуваат да плаќаат навреме и строго да ги почитуваат законските одредби.

Рафајловски вели дека состојбата со доцнење на плаќањата и досега беше лоша, но сега со кризата поради коронавирусот, дополнително се влошува.

„Не можеш некому да му бараш пари, кога знаеш дека и тој нема. Во вакви околности да се повикуваш на Законот за финансиска дисциплина, значи да го изгубиш партнерот за работа. Ова се вонредни услови, и во вонредни услови сите се бориме да опатснеме“, вели за Фактор бизнисменот Рафајловски.

ЗАКОНОТ И ДОСЕГА НЕ СЕ ПОЧИТУВАШЕ

Тој објаснува дека и досега не функционирал Законот за финансиска дисциплина, бидејќи не бил убаво предвиден, без вистински начин како да биде применливо тоа законско решение, ниту, пак, според него, се најде вистински контролен орган.

„УЈП, според мене, нема доволно кпацитет да ја исконтролира ниту наплатата на даноците, а не пак спроведувањето на Законот за финансиска дисциплина. Практично, овој закон никогаш вистински не профункционира. Можеби повеќе проблемите се решаваат преку тужби и барања, но законот никогаш не профункционира на дело за да ја исполни својата вистинска задача, а таа е да се дисциплинираат компаниите и да плаќаат во законски предвидениот рок“, објаснува Рафајловски.

Од друга страна, компаниите не ни сакаат да ги пријавуваат партнерите кога станува збор за „ситни пари“, бидејќи, вели Рафајловски, во тој случај пријавувањето е неисплатливо, односно поскапо е тоа, отколку побарувањето што ќе се наплати.

Она што Рафајловски сега може да го забележи, иако состојбата е влошена, е дека во принцип, компаниите кои и досега биле редовни со плаќањето, и сега се обидуваат да го задржат тој стил. „Кој не доцни, не доцни, кој доцни, пак ќе доцни, а сега и уште повеќе“, објаснува овој бизнисмен.

Вели дека постојат клиенти и компании што доцнат со плаќањата и по 300 и по 400 дена, а со сегашнава криза, не ни очекува дека некој ќе плати во брзо време.

СЕГА БИЗНИСМЕНИТЕ ПОВЕЌЕ СЕ ЈАВУВААТ ЗА ПАРИТЕ

Миле Бошков, прв човек на Бизнис конфедерацијата, пак, вели дека сега се појавува еден нов тренд, а тоа е дека ако досега доверителите беа потрпеливи и чекаа должниците да им платат, сега тие се повеќе се јавуваат кај своите должници, барајќи да си ги измират обврските.

„Сега е таков трендот. Постои општа паника и мобилизација и кај граѓаните и кај фирмите да соберат што е можно повеќе акумулација кај себе, бидејќи не се знае кој до кога ќе може да издржи врз основа на приходите што ќе ги има, или подобро речено, ќе ги нема или ќе ги очекува. Затоа, за секого е добро кај себе да има што повеќе средства“, вели Бошков за Фактор.

Тој објаснува дека Законот за финансиска дисциплина и досега беше само козметички закон, што се вели, колку да го има, а не влијаеше на зголемување на дисциплината на фирмите.

„Тој закон повеќе влијаеше на подготвеноста на компаниите, на нивната алертност да го користат во ургентни ситуации, односно кога ќе дојде состојба пред тужба, тогаш да се платат средствата“, објаснува Бошков.

Фирмите, објаснува тој, за време на тековната соработка меѓу себе, многу често си должат, и врз основа на воспоставените односи, имаат континуиран долг, кој не се плаќа и по неколку месеци.

„Затоа е најдобро компаниите, пред да стапат во нови контакти и во нови деловни односи, да ги користат податоците на Кредитното биро, со цел да ја осознаат кредитната, односно должничката истуреност на новиот потенцијален партнер“, објаснува Бошков за Фактор.

Се очекува да се види дали и кави мерки би донела Владата во оваа насока.

Нина Нинеска-Фиданоска

Можеби ќе ве интересира

АНГЕЛОВСКА ЗА ПЛАТЕЖНАТА КАРТИЧКА: Ќе им помогне на погодените и ќе ја намали сивата економија

АНГЕЛОВСКА ЗА ПЛАТЕЖНАТА КАРТИЧКА: Ќе им помогне на погодените и ќе ја намали сивата економија

БЕА БРОЈ ЕДЕН: Херц оди во стечај

БЕА БРОЈ ЕДЕН: Херц оди во стечај

ПОДАТОЦИ ЗА ПЛАТИ: Еве колку заработуваат Германците

ПОДАТОЦИ ЗА ПЛАТИ: Еве колку заработуваат Германците

Професорката Наумовска нов член на Надзорниот одбор на Прокредит банка

Професорката Наумовска нов член на Надзорниот одбор на Прокредит банка

МБА: Ќе се одржи националниот натпревар на Европскиот квиз на пари

МБА: Ќе се одржи националниот натпревар на Европскиот квиз на пари

За Алкалоид, Комерцијална банка и НЛБ банка бесплатни инвестициски анализи

За Алкалоид, Комерцијална банка и НЛБ банка бесплатни инвестициски анализи

Предвидувањата за вакцините ќе го придвижат пазарот на капитал: Генерали инвестментс совети

Предвидувањата за вакцините ќе го придвижат пазарот на капитал: Генерали инвестментс совети

Нина Ангеловска задоволна од состанокот со банкарите, кои ќе треба да изработат 300.000 платежни картички

Нина Ангеловска задоволна од состанокот со банкарите, кои ќе треба да изработат 300.000 платежни картички