АКО КОРИСТИТЕ ПЛИНСКИ БОЦИ - никако грејни тела во нивна близина и вентилите да се добро затворени

Добивај вести на Viber

Немојте да ставате грејни тела во близина на плински боци, бидејќи тие се под притисок, па секое вакво невнимание може да доведе до тешки последици.

Исто така, треба да внимавате од боците да не истекува плин, односно вентилите од боците да се добро затворени, и тоа не смее никако да се заборави. Бидејќи, секоја мала искра или доколку се запали цигара во таков случај, може да доведе до експлозија и до катастрофален пожар. 

Вакви предупредувања даваат пожарникарите, откако кумановско Романовце денеска беше потресно од големата трагедија, кога при експлозија на плинска боца загинаа три дечиња, а од седумте повредени, четири лица се борат за живот на скопска клиника, со висок степен на изгореници. 

Министерот за здравство, Венко Филипче, ги посети повредените во експлозијата кај Романовце. 

Според него, двајца мажи на околу 60 годишна возраст се на Клиниката за пластична хирургија, а две жени на 40 и 45 годишна возраст се на одделот за интензивна нега на Клиниката за анестезија и реанимација.

„Од тројцата пациенти во старата Градска болница, една жена на 40 годишна возраст е во одделот за интензивна нега, има и помлада жена од дваесетина години која е бремена, како и едно дете кое што има мал процент на изгореници“, додава Филипче.

Од вкупно седумте пациенти, четворица се во навистина тешка состојба, со висок степен на изгорениците и се наоѓаат во животна опасност.

Трите дечиња што загинаа имале осум, девет и 11 години, говорат извори на Фактор.

Според сознанијата, двете дечиња кои се помали, од осум и девет години, имале исти презимиња, додета третото детенце најверојатно им било братучетче, бидејќи тие всушност биле деца на две ќерки кои во куќата каде што експлодирала плинска боца, биле на гости кај своите родители.