Активна соработка помеѓу студентите по археологија и Националната установа Стоби

Добивај вести на Viber

Во текот на вчерашниот ден (на 16.05.2018 година), во просториите на Националната установа за управување со археолошкиот локалитет Стоби, беше потпишан Меморандум за соработка помеѓу Студентското археолошко здружение „Аксиос“ - Скопје, претставувано од претседателот Игор Ефтимовски, и Националната Установа Стоби, претставувана од директорот м-р Мишко Тутковски.

Заснован врз принципите на еднаквост и реципрочност, Меморандумот ќе претставува рамка за идната соработка помеѓу двете страни во насока на организација и реализација на заеднички проекти, научни и студентски конференции, обуки, летни школи, едукативни кампови, семинари, работилници, изложби, промоции и трибини.

Во моментот, членови на Студентското археолошко здружение „Аксиос“ учествуваат во теренски истражувања на комплексот објекти околу храмот на Изида во Стоби предводени од раководителот м-р Јован Радњански од НУ Стоби, и во изработката на дигитална документација на откриените ситуации во соработка со претставници од Универзитетот Квинс од Канада.

Студентското археолошко здружение „Аксиос“ - Скопје е формирано во 2001 година со цел да ги обединува студентите по археологија и историја на уметност од Македонија во едно креативно тело преку кое ќе ги надградуваат своите професионални и стручни знаења и ќе го промовираат културното наследство на државата.