Добивај вести на Viber
Активностите во приватниот сектор во еврозоната, во август, забележаа најголем скок по повеќе од две години, информира денеска, во првата проценка, угледниот лондонски инситут Маркит кој потенцира дека еврозоната го бележи долгоочекуваното опоравување.
Индексот ПМИ за приватниот сектор во еврозоната скокна овој месец на 51,7 поени што е негова најголема вредност во последните 26 месеци, објави Маркит. Во јули овој индекс изнесуваше 50,5 поени.
Меѓу најголемите економии, Германија забележала најголем раст на активностите во приватниот сектор благодарение на скокот на новите нарачки. Притоа, активностите во индустријата скокнале на највисоко ниво во нешто повеќе од две години додека пак, услужниот сектор бележи најголем раст во последните шест месеци. Во француската економија, активностите во август повторно се намалиле и тоа со нешто побрзо темпо во споредба со јули. Остатокот од еврозоната забележал раст на активностите за првпат од 2011 година.