Ангелов: Верувам дека Мицкоски му должи на Груевски затоа што е поставен за претседател на партијата
Објавено во: Македонија 24 Јануари, 2020
Претседателот на Достоинство, Стојанче Ангелов, смета дека ВМРО-ДПМНЕ сака упорно да заштити некои свои истакнати членови, почнувајќи од почесниот претседател. Затоа и не може да се постигне договор за законот за јавно обвинителство, за кој преговараат власта и опозицијата.
Тој ова го истакна во вчерашното гостување во емисијата „Само вистина“ на Канал 5 телевизија.
„Од страна на ВМРО-ДПМНЕ се работи за обид за заштита на некои нивни истакнати членови, почнувајќи од почесниот претседател… пред се се работи за сокривање на огромен криминал кој што беше направен во тој 10-годишен режим на Никола Груевски. Верувам дека Мицкоски му должи, затоа што е поставен претседател на партијата и тука ја гледам целата борба, да се избегне кривична одговорност. За жал, тоа успешно го направија. Видете колку предмети застареа“, рече Ангелов.
Според него, власта е искрена во намерата да расчисти со криминалот на претходната гарнитура.
„Се појави сомнеж дали власта е искрена во намерата да расчисти со одреден криминал направен во времето на Груевски. Јас знам дека е искрена, но едноставно начинот на којшто сега се одвиваат судењата и Законот за кривична постапка оневозможуваат одредени судења да бидат благовремено завршени“, рече Ангелов.