Анѓушев: 40 милиони евра, планирани средства за поздрава животна средина
Објавено во: Економија 23 Март, 2018
На Технолошко-металуршкиот факултет во Скопје, денеска започна конференцијата ГРЕДИТ 2018: „Загаденоста на
воздухот и нерегулирани депонии“ во
организација на Балканската асоцијација за животна средина БЕНА
Оваа конференција кадешто ќе бидат презентирани преку 150 научни трудови на
научници од 20 држави ќе трае два дена.
Заменик претседателот на Владата задолжен за економски прашања, д-р Кочо Анѓушев на свеченото отворање на конференцијата ја цитираше изјавата на Чарлс Дарвин: „Не преживуваат најјаките видови, ниту најинтелигентните, туку оние кои се најприлагодливи на промените“.
„Токму затоа, во светот кој брзо се менува, Македонија мора постојано да биде во тек со новите технологии и иновации, во секоја област, па и во екологијата и заштитата на животната средина“, нагласи вицепремиерот.
Анѓушев посочи дека климатските промени се реалност и токму
поради тоа екологијата и заштитата на животната средина се високо во агендата
на Владата на Република Македонија, со цел намалување на ефектите од климатски
промени. Тој дополни дека во периодот кој следи ќе се реализираат проекти со
кои ќе се овозможи поздрава животна средина и подобар живот за македонските
граѓани.
„Практично, сите сме сведоци како климатските и еколошките
промени не предупредуваат. За жал, сите забораваме на овие предупредувања
откако ќе помине кризата, но само до следната криза, која може да биде
поголема. Затоа, треба да се определиме за похрабри чекори кон решавање на
проблемите со животната средина. Прв ваков чекор е да се реши проблемот со
дивите, но и со организираните депонии на смет во државата“, рече Анѓушев
Тој додаде дека Во рамките на Владата е
склучено договор за организиран,
регионален пристап кон овој проблем.
„Ќе отвориме 4 регионални депонии, за собирање и преработка на сметот. Втор
чекор е решавање на проблемот со отпадните води кои треба да се соберат во
организиран канализационен систем и да бидат прочистени пред да се пуштат во
природните води. Средствата кои беа планирани за изградба на карго аеродром во
близина на Штип, околу 40 милиони евра, за кој нема финаниска исплатливост, ќе
гледаме да ги пренамениме токму за овој проект“, дополни Анѓушев.
На отворањето на конференцијата се обратија и потпретседателот на Балканската асоцијација за животна средина, г-дин Џабер Занбак, претседателката на Советот на Град Скопје, д-р Љубица Јанчева и претседателот на ГРЕДИТ конференција и професор на Машинскиот факултет во Скопје, д-р Даме Димитриевски.