Анѓушев: Придобивките од договорот се големи, ќе има полесен пристап до фондови
Објавено во: Економија 18 Јуни, 2018
Решениот спор со Грција на земјава ќе и донесе и економски бенефит, но и финансиски импликации.
Ова денес го истакна вицепремиерот за економски прашања Кочо Анѓушев кој смета дека придобивките се многу големи, без разлика на трошоците што можеби ќе настанат од имплементацијата на овој договор.
„Економските бенефити од договорот со Грција и од решението на овој проблем или прашање за нашите идни генерации ќе бидат неспоредливо повисоки од кој било трошок што би настанал за имплементација на овој договор“, посочи Анѓушев.
Тој вели дека сите трошоци што ќе ги имаат институциите поради промената на документите како резултат на спроведувањето на договорот за промена на името, ќе се подмируваат постепено.
„Тоа е оставено да биде во еден временски период паралелно со преговорите за членство во ЕУ. Сите во тој период и секако ќе мора да менуваат документи или какви било други материјали кои ќе предизвикаат трошоци“, истакна вицепремиеро нагласувајќи дека по влегувањето во НАТО и ЕУ земјите од соседството имаа сериозни позитивни финансиски импликации: зголемување на странски инвестиции, отворање на европски фондови, полесен пристап до фондови.