Анѓушев: Владата ќе ги поддржи компаниите со поврат од 20% за исплатена нето плата во висина над 18.000 денари
Објавено во: Економија 10 Март, 2018
Интерес за индустриска зона во Куманово, мерки за поддршка на нови инвестиции и поддршка на нови вработувања во компаниите. Ова денеска на трибината во Куманово посветена на Планот за економски раст го истакна вицепремиерот Кочо Анѓушев.
Тој пред 70 компании од Куманово и кумановската околина најави Предлог закон за финансиска поддршка на инвестициите и среднорочна програма за поддршка на малите и средните претпријатија, со кои практично се операционализираат мерките и стопанствениците веќе од оваа година ќе бидат во можност да повратат дел од вложените средства во развојот.
Презентирајќи го Планот за економски раст Анѓушев рече дека за поттикнување на нови подобро платени работни места, Владата ќе ги поддржи компаниите со поврат од 20% за исплатена нето плата во висина над 18.000 денари, за ново вработените лица.
Тој исто така рече дека инвеститорите ќе бидат во можност да направат поврат во висина од 10% од направените инвестиции во основни средства за работа, или 20% доколку инвестициите се направени за подобрување на конкурентноста на пазарите а оваа година ќе се издвојат средства во буџетот со кој ќе се започне практична реализација на нова индустриска зона во Куманово.
Анѓушев посочи дека за направени инвестиции во технолошки развој, микро, малите и средни компании може да добијат поврат во висина до 30% од направената инвестиција, а доколку инвестицијата е направена со цел да се развие нов иновативен производ, компаниите може да очекуваат помош во висина до 70% од направените вложувања.